Haki Bllacaku, trajneri i parë i Amir Rrahmanit te KF Kosova e Prishtinës, ka reaguar ashpër pas vendimit të kapitenit të Kosovës për t’u tërhequr nga kombëtarja dardane.

Rrahmani ka bërë të ditur se nuk do të rikthehet te Kombëtarja përderisa Federata e Futbollit të Kosovës udhëhiqet nga drejtuesit aktualë.

Pas këtij vendimi, Bllacaku ka publikuar një fotografi nga koha kur Rrahmani kishte nisur hapat e parë në futboll te KF Kosova – Prishtinë, ku ai ishte trajneri i tij i parë.

Fotografinë e ka shoqëruar me një mesazh të ashpër:

“Nuk thonë kot: buka jote të vret! Ose më mirë me thënë: i ligu, kur bëhet dikushi, s’e njeh as familjen e vet, as ata që i bëjnë mirë. Dole i tillë, TURP!!!”, ka shkruar Bllacaku.

Reagimi i tij vjen në një kohë kur vendimi i Rrahmanit ka hapur debat të madh në opinionin sportiv kosovar, ndërsa fotografia e publikuar nga trajneri i tij i parë rikthen në vëmendje fillimet e kapitenit të Kosovës në futboll.