Han sot në Shkup, edhe një tentim për zgjidhjen e krizës
Komisari për negociata dhe zgjerim i Bashkimit Evropian Johannes Hahn, do ta vizitojë sot Maqedoninë, për t’u takuar me liderët e katër partive më të mëdha politike.
Sipas paralajmërimeve, kjo do të jetë përpjekja e fundit për arritjen e një marrëveshjeje mes liderëve politikë në Maqedoni, gjegjësisht mes kryeministrit dhe lider i VMRO-DPMNE-së Nikolla Gruevski dhe liderit të LSDM-së dhe opozitës maqedonase Zoran Zaev. Në takimet e këtilla të liderëve marrin pjesë edhe kryetarët e dy partive më të mëdha shqiptare në Maqedoni, Ali Ahmeti i BDI-së dhe Menduh Thaçi i PDSH-së.
Komisarin Hahn kësaj radhe në Shkup do ta shoqërojë treshja e euro-parlamentarëve Richard Hoëitt, Ivo Vajgl dhe Eduard Kukan.
Në takimin e fundit eurokomisari Han nuk mori pjesë me arsyetimin se palët në bisedime nuk kishin lëvizur nga pozicionet e tyre të ngurta.
Në një tentim për të nxitur zgjidhjen e krizës së thellë politike në të cilën gjendet vendi, dje në Shkup qëndroi edhe ndihmëssekretarja amerikane e Shtetit Victoria Nuland, e cila pati takime të ndara me të katër liderët.
