Hetimi për “Fondin e zi”, Benfika lirohet nga akuzat pas 10 vitesh nga nisja e procesit

Klubi sportiv i Benfikës, bashkë me ish-presidentin Luís Filipe Vieira dhe të akzuar të tjerë në procesin e njohur si “Saco Azul” (termi portugez për “Fondi i zi”), janë liruar nga akuzat në shkallën e parë rreth 10 vjet pas nisjes së hetimit. Pas këtij vendimi pritet të ketë rekurs nga Prokuroria.

Hetimi kishte të bënte me një sistem të dyshuar mashtrimi, të bazuar mbi kontrata fiktive të firmosura nëpërmjet kompanisë Questão Flexível të sipërmarrësit José Bernardes. Sipas akuzës, nëpërmjet këtij sistemi janë marrë nga kasat e klubit rreth 1.8 milionë euro, por për gjykatën nuk ishte mundur të qartësohej përgjegjësia individuale e të akuzuarve.

Presidenti aktual i Benfikës, ish-futbollisti Rui Costa, u shpreh shumë i kënaqur pas vendimit: “Kjo është një fitore për Benfikën, para së gjithash. Ishin 10 vite proces, që është mbyllur me vendimin që donim dhe shpresonim. Në sport shkohet më shumë se në një imazh të thjeshtë publik”.

I kënaqur ishte edhe Luís Filipe Vieira, që në 2021-shin iu desh të linte presidencën pas një tjetër hetimi, “Kartoni i kuq”, për veprime të dyshimta financiare në lidhje me blerjen dhe shitjen e më shumë se 50 lojtarëve në periudhën 2012-2020.