Hetuesit rusë marrin në pyetje kryeredaktorin e Novaya Gazeta pas bastisjes në banesën e tij

Kryeredaktori i gazetës së pavarur ruse Novaya Gazeta, Sergei Sokolov, u mor në pyetje të enjten nga hetuesit në Moskë, siç njofton Reuters. Sipas njoftimit të vetë gazetës, redaksia humbi kontaktin me të rreth mesditës me orën lokale, pak para një mbledhjeje redaksie, ndërsa më pas u bë e ditur se ai ishte dërguar në zyrat e Komitetit Hetimor shtetëror, ku një avokat i gazetës u nis për ta takuar.

Agjencia shtetërore TASS, duke cituar burime nga organet e zbatimit të ligjit, raportoi se marrja në pyetje lidhej me një çështje për “përdorim të paligjshëm të të dhënave personale”. Hetimi pasoi bastisjen që autoritetet kryen në banesën e Sokolov-it, zhvillim që e shton trysninë ndaj një prej pak zërave mediatikë të pavarur që kanë mbetur në Rusi.

Që nga nisja e luftës në Ukrainë në vitin 2022, Moska i ka ashpërsuar ligjet e censurës dhe presionin ndaj mediave të pavarura. Sipas organizatës Gazetarët pa Kufij, aktualisht në vend mbahen të burgosur 50 gazetarë dhe punonjës të medias. Vetëm të martën, autoritetet ruse ndaluan edhe një gazetar japonez, nën dyshime për spiunazh.

E themeluar në vitin 1993, Novaya Gazeta është bërë e njohur për hetimet mbi korrupsionin dhe për raportimin kritik ndaj politikave të Kremlinit. Në prill, një tjetër gazetar i saj, Oleg Roldugin, u arrestua me akuza të ngjashme për të dhënat personale, vepër që mund të dënohet deri me 10 vjet burg, dhe ai ndodhet në arrest shtëpie në pritje të gjyqit.

Para Sokolov-it, gazetën e drejtonte Dmitry Muratov, i cili në vitin 2021 ndau Çmimin Nobel për Paqen dhe ia kushtoi atë gjashtë kolegëve të vrarë për shkak të punës së tyre gazetareske.