Hiroshima shënon 70-vjetorin e sulmit me bombë

Banorët e qytetit japonez Hiroshima po përkujtojnë 70-vjetorin e bombës së parë atomike që është lëshuar ndonjëherë nga SHBA-të.

Në ceremoninë kryesore në parkun memorial në Hiroshima ka marrë pjesë edhe kryeministri Shinzo Abe, ndërsa mijëra fenerë janë lëshuar mbi lumin Motoyasu në këtë qytet.

Bomba në Hiroshima, dhe e dyta tre ditë më vonë në Nagasaki, solli edhe fundin e Luftës së Dytë Botërore, por shkaktoi vdekjen e së paku 140 mijë personave.

Kryeministri Abe bëri thirrje për një botë pa armë bërthamore, duke thënë se bomba në Hiroshima nuk shkaktoi vetëm vdekjen e mijëra vetave, por solli edhe vuajtje tek të mbijetuarit.

“Sot Hiroshima është ringjallur. Është bërë një qytet i kulturës dhe i prosperitetit. 70 vjet pas ngjarjes më duhet të ritheksoj nevojën për një botë në paqe, pa armë bërthamore”, u shpreh Abe.

Në ceremoni, përpos kryeministrit Abe dhe kryetarit të Bashkisë së Hiroshimës, Kazumi Matusi, ka marrë pjesë edhe ambasadorja amerikane në këtë shtet, Caroline Kennedy.

Më 6 gusht 1945, saktësisht në ora 08:10, bomba u lëshua mbi qytet, që mori jetën e 70 mijë vetëve, ndërsa mijëra të tjerë vdiqën nga lëndimet dhe rrezet radioaktive pas disa ditësh, javësh dhe muajsh.