Hoti: Besueshmëria e pasqyrave financiare tërheq investitorë dhe investime

Ministria e Financave e qeverisë së Kosovës zhvilloi sot tryezën me temë “Rëndësia dhe besueshmëria e Raportit financiar”, në të cilën morën pjesë ministri i Financave Avdullah Hoti, i cili theksoi se besueshmëria e pasqyrave financiare tërheq investitorë dhe investime në Kosovë.

“Ministria e Financave dhe qeveria do të angazhohen edhe më tutje në zhvillimin dhe ngritjen e profesionit dhe profesionistëve në fushën e kontabilitetit dhe auditimit, në mënyrë që kjo të rrisë besueshmërinë e pasqyrave financiare, si një ndër faktorët më të rëndësishëm për tërheqjen e investitorëve dhe investimeve nga jashtë në Kosovë”, tha ministri Hoti, i cili theksoi veçanërisht kontributin e dhënë nga Banka Botërore.

Përfaqësuesja e Bankës Botërore Kalina Sukarova, prezantoi reformimin e kërkesave për raportim financiar, ku sipas saj, është e rëndësishme që mangësitë rreth pajtueshmërisë me acquis të identifikohen dhe adresohen në mënyrën e duhur duke ndryshuar legjislacionin përkatës të raportimit financiar të korporatave.

“Ndryshimi i legjislacionit nuk do t’i zgjidhë sfidat vetvetiu. Legjislacioni duhet të zbatohet”, theksoi ajo në tryezën ku u arrit në konkluzion se është e nevojshme rritja e përmbushjes së kërkesave sipas ligjit.

Në tryezë morën pjesë edhe kryesuesi i Këshillit Kosovar për Raportim Financiar, Gem Maloku, përfaqësues nga Ministria e Zhvillimit Ekonomik, Ministria e Tregtisë dhe Industrisë, Banka Qendrore e Kosovës, të bankave komerciale, të shoqatave të kontabilistëve, të firmave të auditimit si dhe të bizneseve.