I armatosur me sharrë elektrike, plagos pesë persona

Pesë persona kanë mbetur të plagosur, dy prej të cilëve rëndë, nga sulmi i një burri të armatosur me sharrë elektrike në Schaffhausen të Zvicrës.

Zona qëndrore e qytetit të ndodhur shumë pranë kufirit me Gjermaninë, është rrethuar nga policia që po kërkon intensivisht agresorin e larguar nga vendi i ngjarjes. Autoambulancat mbërritën me urgjencë ndërsa mbi kokat e njerëzve atje fluturojnë helikopterë të policisë.

Autoritet e sigurisë e përjashtuan megjithatë që në fillim mundësinë që sulmi të ketë sfond terrorist.

Dyqanet aty rrotull janë mbyllur që të gjitha dhe banorët janë këshilluar të shmangin zonën e incidentit.

Policia e konfirmoi në një konferencë për shtyp se e njeh identitetin e agresorit, i cili ka hyrë i armatosur në një kompleks zyrash të qytetit historik, kryeqendra e kantonit zviceran me të njëjtin emër, por ende nuk ka rënë në gjurmët e tij.