I nxehti ndikon edhe në shëndetin mendor/ Ekspertët paralajmërojnë për rritje të ankthit dhe agresivitetit

Temperaturat ekstreme nuk dëmtojnë vetëm organizmin, por mund të shkaktojnë edhe probleme të shëndetit mendor, duke rritur irritimin, ankthin dhe madje edhe sjelljet agresive. Me valët e të nxehtit që po prekin gjithnjë e më shumë Europën, ekspertët paralajmërojnë se ndikimi i tyre nuk është i njëjtë për të gjithë.

Psikologia klinike Susan Albers nga Cleveland Clinic tha për Euronews se studimet tregojnë se në ditët më të nxehta rriten rastet e agresivitetit, zemërimit në trafik, dhunës dhe vizitave në urgjencë për probleme të shëndetit mendor.

Sipas saj, temperaturat e larta e vendosin trurin nën stres, pasi ai duhet të punojë më shumë për të mbajtur trupin të freskët. Kjo lë më pak energji për të kontrolluar emocionet dhe për të ruajtur qetësinë. Ekspertët theksojnë se dehidratimi e përkeqëson situatën. Edhe mungesa e lehtë e lëngjeve mund të ndikojë në zonat e trurit që kontrollojnë vëmendjen, vendimmarrjen dhe emocionet, duke shkaktuar konfuzion, ankth dhe nervozizëm.

Për të shmangur këto pasoja, Organizata Botërore e Shëndetësisë rekomandon konsumimin e të paktën 2–3 litrave ujë në ditë, si dhe ftohjen e trupit me pije të freskëta ose kompresa të ftohta në qafë, kyçe dhe këmbë. Një tjetër problem gjatë valëve të të nxehtit janë netët tropikale, kur temperatura nuk zbret nën 20 gradë Celsius. Kjo pengon organizmin të rikuperohet gjatë natës dhe ndikon në cilësinë e gjumit.

Sipas ekspertëve, mungesa e gjumit e bën njeriun më të ndjeshëm emocionalisht, më të paduruar dhe më pak të aftë për të përballuar stresin e përditshëm. Personat që vuajnë nga çrregullime të shëndetit mendor janë edhe më të rrezikuar. Hulumtimet tregojnë se temperaturat e larta mund të përkeqësojnë ankthin, depresionin, simptomat e skizofrenisë, si dhe të rrisin rrezikun për sjellje vetëvrasëse.

Ekspertët paralajmërojnë gjithashtu se disa medikamente, përfshirë antidepresivët, stimuluesit, antihistaminikët dhe barnat për tensionin e gjakut, mund ta bëjnë më të vështirë për trupin të rregullojë temperaturën ose të rrisin rrezikun e dehidratimit gjatë ditëve me vapë.