I nxehti vrasës shkakton alarm për nivelin e ozonit në qytetin 18 milionësh

I nxehti vrasës i rreth 2 000 personave, që ka mbërthyer Indinë që prej 10 ditësh, ka shkaktuar rritje të ndotjes atmosferike në Nju Delhi, sidomos përsa i përket ozonit, njoftoi sot media indiane.

Sipas centraleve të Sistemit të Cilësisë së Ajrit dhe Kërkimeve Meteorologjike indiane (SAFAR), mesatarja e ozonit e përllogaritur gjatë një fashe tetë orarëshe arriti nivelin e 240 mikrogramëve për metër kub, thënë ndryshe dyfishi i lejuar që është 100 mikrogramë për metër kub.

Sipas ekspertëve, ndotja nga ozoni, shpesh i përcaktuar si ”smog veror” pasi krijohet nga rrezatimi i fortë diellor, shkakton shqetësime në frymëmarrje, edhe nëse ndodh për pak kohë.

Kryeqyteti indian me 18 milionë banorë është përcaktuar nga OBSH-ja si më i ndoturi në botë, sidomos për nivelin e pluhurit që del nga skapamentot, kantieret e ndërtimit dhe aktivitetet e ndryshme djegëse.