I preu fytin gruas në Londër, rrëfehet shqiptari: Dyshoja se nuk ishte e virgjër dhe kishte abortuar

Të tjera detaje zbulohen për vrasjen e shqiptares Elidona Demiraj në Londër një vit më parë nga bashkëshorti i saj Arben Rexha.

Ngjarja ndodhi më 31 janar 2016, në veri të Londrës, teksa 32-vjeçari Arben Rexha i mori jetën 25-vjeçares Elidona Demiraj duke e goditur me thikë. Ai ka pranuar krimin, pasi dyshonte se bashkëshortja e kishte gënjyer për virgjërinë që në takimin e tyre të parë, njofton media italiane newnotizie.it.

Gjithashtu Arben Rexha ka thënë se dyshonte se gruaja kishte abortuar njëherë, pas një lidhjeje që kishte pasur para njohjes me të.

Hetimet treguan se nga momenti i vrasjes ata kishin rreth 12 javë që jetonin së bashku. E reja kishte shkuar vetëm nga Shqipëria në Britaninë e Madhe tre muaj para se të vritej.

“Ishte me të, ishin martuar dhe jetonin së bashku”- ka thënë prokurori Richard Christie.

“Burri mendonte se gruaja takohej me dikë tjetër dhe ishte shumë xheloz”- shkruajnë mediat, referuar burimeve nga hetimet.

Rexha ka treguar për fiksimin që kishte pasur për lidhjen e saj të parë dhe ka treguar se dyshonte se ajo kishte bërë një abort. Madje ai ka thënë se dyshonte se gruaja e tij mund të ishte përdhunuar.