Ibrahimaj: Të angazhuar për të vazhduar me reduktimin e borxhit në vend
Ministrja e Financës dhe Ekonomisë, Delina Ibrahimaj deklaroi sot se, MFE është e angazhuar për të vazhduar me reduktimin e borxhit në vend.
Në fjalën e saj në Kuvend, ku u diskutua projektligji “Për menaxhimin e garancive dhe kredive shtetërore të pakthyera”, Ibrahimaj u shpreh se, “ky pr/ligj është një mjet tejet i rëndësishëm në bashkësinë e të gjithë ndërhyrjeve tona për të përmirësuar menaxhimin e borxhit publik në Shqipëri”.
“Pr/ligji është një tjetër përmirësim i rëndësishëm i kuadrit ligjor, në ndihmë të optimizimit të menaxhimit të borxhit publik. Ky pr/ligj rregullon disa procese të lidhura me menaxhimin efektiv të skemave të veçanta të garancive sovrane që i vijnë në ndihmë biznesit dhe i kanë ardhur në ndihmë biznesit në të gjithë situatat e vështira që ekonomia shqiptare ka përballuar, që biznesi shqiptar ka përballuar”, u shpreh Ibrahimaj.
“Në dhjetor 2022 ne miratuam në Kuvend ndryshimet për shtesat në ligjin për huamarrjen shtetërore, borxhin shtetëror dhe garancitë shtetërore të huas në Republikën e Shqipërisë. Këto ndryshime përfshijnë parashikimet përkatëse për këto lloj skemash garancie dhe procedurat që ligji parashikon për lëshimin e garancive. Ky pr/ligj synon të plotësojë menaxhimin dhe rikuperimin e pikërisht këtyre garancive”.
“Pas 3 vitesh dhe pas 3 skemash garancie të suksesshme, të miratuara për biznesin, me një disbursim total prej 25 miliardë lekësh dhe 1 mijë biznese përfituese, ne sot jemi gati të bëjmë një bilanc paraprak të këtij instrumenti specifik në ndihmë të biznesit”, tha Ibrahimaj.
Ajo theksoi se, “Agjencia e Trajtimit të Kredive, që tashmë do të quhet Agjencia e Menaxhimit të Garancive dhe Kredive të Pakthyera dhe do të ketë tashmë kompetenca të rëndësishme, do të marrë ato kompetenca të cilat deri tani i ka trajtuar, i ka pasur MFE”.
“Agjencia e Menaxhimit të Garancive dhe Kredive të Pakthyera do të mundësojë ndjekjen efektive dhe rikuperimin e detyrimit që lind pas pagesës së garancisë sovrane”, shtoi Ibrahimaj.
