Identifikohen dy të dyshuar për rrahjen e një 23-vjeçari në Mitrovicën e Veriut, njëri ndalohet për 48 orë

Policia e Kosovës ka identifikuar dy persona të dyshuar për veprën penale “Lëndim i lehtë trupor”, pas një përleshjeje që ndodhi më 17 tetor në një lokal në Mitrovicën e Veriut, siç njofton Drenica Press duke iu referuar njoftimit të Policisë.

Sipas Policisë, rasti është raportuar rreth orës 23:45 përmes Qendrës së Thirrjeve 192, në rrugën “Zoran Dindić”. Njësitë policore kanë dalë në vendin e ngjarjes, ku kanë kuptuar se një person ishte dërguar nga emergjenca në spital për trajtim të mëtejmë. Viktima, një 23-vjeçar, ka deklaruar para policisë se ishte sulmuar me mjete të forta dhe grushte nga persona të panjohur.

Pas veprimeve hetimore, policia i ka identifikuar dy të dyshuarit, të cilët janë kërkuar në adresat e tyre të banimit në Mitrovicën e Veriut dhe në Zveçan. Të dy janë paraqitur të mërkurën, më 21 tetor, në stacionin policor, ku janë intervistuar nga hetuesit.

Me urdhër të prokurorit të shtetit, të dyshuarit N.M., i lindur më 1995, i është caktuar masa e ndalimit për 48 orë, ndërsa i dyshuari D.M., i lindur më 2000, është liruar në procedurë të rregullt. Policia ka theksuar se mbetet e përkushtuar në trajtimin profesional të rasteve dhe u ka bërë thirrje qytetarëve që çdo rast të dyshimtë ta raportojnë në numrin 192.