IKMT, aksion në Sarandë; shpërthim të kontrolluar ndërtesës 4-katëshe

Inspektoriati Kombëtar për Mbrojtjen e Territorit ka njoftuar se do të realizojë këtë të shtunë një shembje me shpërthim të kontrolluar në Sarandë për prishjen e një ndërtese.

Sipas një njoftimi zyrtar, operacioni i IKMT është në mbështetje të bashkisë së këtij qyteti për realizimin e projektit për ndërtimin e rrugës numër 5, Loti 2 dhe 3.

Objekti ka katër kate mbi tokë dhe një kat nën tokë, me një sipërfaqe të përgjithshme prej 400 metër katrorë. Në trupin e tij janë hapur 200 vrima ku do të vendosen 10 kilogramë lëndë eksplozive tip C4.

Shpërthimi do të realizohet në orën 13:00. Operacioni i IKMT-së do të vijojë edhe me prishjen e disa objekteve të tjera, 1 dhe 2-katëshe.