Inspektorati mbyll një biznes në Zubin Potok dhe gjobit një tjetër me 6 mijë euro për alkool te të miturit

Inspektorati Qendror i Mbikëqyrjes së Tregut (IQMT) ka ndërmarrë masa ndaj disa subjekteve ekonomike në komunën e Zubin Potokut, gjatë inspektimeve të fundit në kuadër të mbikëqyrjes së vazhdueshme të tregut në të gjithë territorin e Kosovës, siç njofton Indeksonline.

Sipas inspektoratit, një subjekt që ushtronte veprimtarinë pa u regjistruar në Agjencinë për Regjistrimin e Bizneseve të Kosovës (ARBK) është mbyllur, ndërsa gjatë kontrollit janë konfiskuar edhe produkte pa deklaracion të prejardhjes.

Një subjekti tjetër ekonomik i është shqiptuar gjobë prej 6 mijë eurosh, pasi u ka shërbyer pije alkoolike personave të mitur, raporton edhe Sinjali.

Këto veprime, sipas Ministrisë së Industrisë, Ndërmarrësisë, Tregtisë dhe Inovacionit, janë pjesë e angazhimit për mbrojtjen e konsumatorëve dhe garantimin e një tregu të sigurt, transparent dhe të drejtë për të gjithë qytetarët e Republikës së Kosovës.

Inspektorati u ka bërë thirrje të gjitha subjekteve ekonomike që të regjistrojnë rregullisht veprimtarinë e tyre, të tregtojnë vetëm produkte me dokumentacionin përkatës dhe të respektojnë dispozitat ligjore, duke paralajmëruar se inspektimet dhe mbikëqyrja do të vazhdojnë në të gjithë territorin e vendit.