Irak, arkivol xhami për bashkëpunëtorin e Hussein
Policia irakene ka marrë të dorëzuar në një arkivol xhami trupin pa jetë të ish-krahut të djathtë të Saddam Hussein.
Autoritetet deklaruan se Izzat Ibrahim al Douri kishte humbur jetën në luftimet kundër trupave qeveritare në provincën e Salahudinit, në veri të Bagdadit, ditën e premte.
Tani, trupi i tij ndodhet në Bagdad dhe në momentin e dorëzimit, një turmë e madhe është mbledhur për ta parë atë.
Arkivoli me xham transparent që mbante kufomën e Al Douri, i cili mbante një mjekër portokalli, u transferua nga një furgon në një makinë qeveritare.
Eventi u transmetua direkt në televizionin publik të Irakut. Al Douri, 72 vjeç, ishte drejtues i një grupi rebelësh që kishte luajtur një rol kyç në ngritjen e ISIS.
Ai kishte qenë një nga personat më të besuar të Saddam Hussein, të cilin e ndihmoi të realizonte grushtin e përgjakshëm të shtetti në vitin 1986.
Si Al Douri edhe Hussein vinin të dy nga Tikriti. Vajza e tij u martua menjëherë më djalin e vogël të diktatorit, Uday, që së bashku me vëllain e tij Qusay u vra nga trupat amerikane në Mosul në korrik 2003.
Më pas ai kishte marrë postin e zëvendësit të Hussein kur ky i fundit u rrëzua nga pushteti pas pushtimit të Irakut në të njëjtin vit. Pas ekzekutimit të diktatorit më 30 dhjetor 2006, Al Douri u konfirmua si lideri i ri i subjektit të ndaluar politik, Ba’ath.
Deri të premten e kaluar ai konsiderohej si figura me profilin më të lartë që kishte arritur t’i shpëtonte kapjes pas pushtimit amerikan.
Ai renditej i gjashti në listën e 55 personave më të kërkuar të hartuar nga ushtria amerikane pas ofensivës që rrëzoi Hussein dhe 10 milionë dollarë ishin vendosur mbi kokën e tij.
