Jevtiq: Incidentet e fundit në Kosovë mjaft shqetësuese

Ministri për komunitete dhe kthim në qeverinë e Kosovës, Dalibor Jevtiq, ka deklaruar se arrestimi i islamistëve të armatosur para manastirit të Deqanit, dhe sulmi i armatosur kundër të serbëve të kthyer në fshatin Berkovë të komunës së Klinës, tregon se gjendja e sigurisë në Kosovë është mjaft e paqëndrueshme, raporton Tanjug.

“Tensionet që muajve të fundit janë duke mbizotëruar në Kosovë, ndikojnë negativisht edhe në situatën e sigurisë, e cila në këto momente është shumë shqetësuese. Dy incidentet që kanë ndodhur brenda një kohe të shkurtër, tregojnë më së miri se është momenti i duhur të ngritët niveli i sigurisë, në mënyrë që të shmanget përshkallëzimi i dhunës, por edhe atë që më shumë po i frikëson dhe shqetëson njerëzit e që është përhapja e ideve të radikalizmit islamik”, ka shtuar Jevtiq, transmeton Telegrafi.

Ai beson se është momenti i fundit që në zonat ku janë kthyer serbët të rritet niveli i sigurisë, sepse sulmet ndaj familjeve të kthyera Pantiq dhe Zhivkoviq flasin mjaft për këtë.

“Për fat të mirë, nuk ka pasur viktima edhe pse në të dy shtëpitë kishte njerëz brenda në ato momente”, ka shtuar Jevtiq.