Kakavijë, policia ndalon 41 sirianë

Policia Kufitare ka bllokuar në orët e para të mëngjesit të sotëm 41 klandestinë sirianë. Burimet zyrtare thonë se klandestinët u ndaluan poshtë fshatit Peshkëpi e Glinë, të cilët ishin duke hyrë në Shqipëri nëpërmjet kufirit të gjelbër. Mes të ndaluarve ishin edhe katër gra e tre fëmijë.

Klandestinët kishin hyrë ilegalisht nëpërmjet kufirit jeshil me shtetin grek gjatë orëve të mbrëmjes, me destinacion Malin e Zi.

Sirianët janë shoqëruar në Pikën e Kalimit Kufitar Kakavijë, ku janë trajtuar me ushqim dhe janë sistemuar në ambiente me ngrohje.

Vijon puna nga Specialistët e Sektorit të Migracionit në Drejtorinë Rajonale për Kufirin dhe Migracionin Gjirokastër për rikthimin vullnetar të tyre.