Kalshi heton baste të dyshimta për zgjedhjen e Katie Zacharia si zëdhënëse e Shtëpisë së Bardhë

Platforma amerikane e tregjeve parashikuese Kalshi ka nisur një hetim mbi një seri bastesh të dyshimta të vendosura për zgjedhjen e Katie Zacharia si zëdhënëse e re e Shtëpisë së Bardhë, siç njofton Reuters, pas një zbulimi fillestar të gazetës Wall Street Journal.

Sipas analizës së Wall Street Journal mbi të dhëna publike të Kalshi, të paktën tre baste të vogla, por me një kohën shumë të saktë, ishin vendosur para njoftimit zyrtar. Një bast prej 19 dollarësh u vendos rreth orës 22:43 të enjten në mbrëmje dhe pritet të paguajë 1,896 dollarë, ndërsa dy baste të tjera prej rreth 74 dhe 80 dollarësh u vendosën rreth orës 13:41 të premten — disa minuta para se lajmi të bëhej publik — dhe pritet të paguajnë përkatësisht 3,689 dhe 4,023 dollarë.

Rreth orës 14:00 të premten, me kohën lindore të SHBA-së, New York Times dhe media të tjera raportuan se Zacharia ishte zgjedhur për postin. Pasditen e së premtes, presidenti Donald Trump e konfirmoi emërimin me një postim në platformën e tij Truth Social.

Ajo që e bën serinë e basteve kaq të dyshimtë është se Zacharia nuk konsiderohej aspak favorite. Në ditët para njoftimit, në platformën Kalshi ajo vlerësohej me vetëm rreth 1% probabilitet për t’u zgjedhur zëdhënëse, ndaj bastet e vendosura pak para njoftimit kanë ngjallur dyshime për përdorim të informacionit të brendshëm.

Zacharia ka shërbyer më parë si zëdhënëse e Departamentit të Sigurisë Kombëtare (DHS) dhe është e njohur si komentatore televizive. Një zëdhënëse e Kalshi konfirmoi hetimin për Reuters, por nuk pranoi të komentojë më tej. Shtëpia e Bardhë nuk i është përgjigjur kërkesës së Wall Street Journal për koment.

Rasti vjen në një moment kur përhapja e shpejtë e tregjeve parashikuese — të rregulluara në SHBA nga Komisioni i Tregtisë së Kontratave të Ardhshme të Mallrave (CFTC) — ka krijuar një tundim të ri: persona me qasje në informacione të brendshme mund të përfitojnë duke vënë baste para se lajmet të bëhen publike, një fenomen që rregullatorët dhe vetë platformat po e ndjekin me vëmendje në rritje.