Kandidatja e ASHE-s për Sarandën, Koka në Berdenesh: Prioritet, ngritja e një qendre shëndetësore
Kandidatja e Aleancës për Shqipërinë Europiane për Bashkinë e Sarandës, Floriana Koka është zotuar se do të zgjidh problemin e ujit të pijshëm.
Gjatë një takimi me banorët e zonës së Berdeneshit, ajo tha se politika nuk është një lojë, politika është kontribut.
“Politika është qe t’ju kthesh njerëzve pas besimin që ata të japin një herë në katër vjet, dhe unë këtë përgjegjësi e ndiej edhe më të madhe se sa mund të mendoni ju”, u shpreh ajo.
Berdeneshi, shtoi Koka, është një zone e cila është krijuar rishtaz edhe si e tillë ka të gjithë problematikën që e shoqëron”.
Sipas saj, problemi i parë është mungesa e një azhurnimi topografik. “Si zonë e re zona e Berdeneshit nuk ka një azhornim topografik të mirëfilltë. Brenda vitit të parë të këtij mandati ju do të jeni të përfshirë në planin e përgjithshëm rregullues të territorit të bashkisë së Sarandës dhe do të ketë mbaruar azhornimi topografik i shtëpive tuaja. Për pjesën tjetër të legalizimeve mund të flasim vetëm pas këtij procesi”, theksoi Koka.
“Pasi të ketë mbaruar azhornimi topografik do të mund të flasim për rrugë të shtruara, me ndriçim dhe me gjelbërim. Pastaj do të mund të flasim për pastrimin që mungon pothuajse krejt”, vijoi kandidatja e ASHE-së për Bashkinë e Sarandës
Ajo tha se është e njoftuar se mungon edhe shërbimi shëndetësor, qendra shëndetësore, si dhe ajo e ndihmës së shpejtë. “Ne me ndihmën e drejtuesve të shërbimit spitalor do të ngrejmë një mjedis që të funksionoje si qendër shëndetësore. Ky nuk është një premtim është një angazhim dhe bashkë do e shohim të funksionojë.
Pjesë e programit tone është dhënia fund e problemit të ujit dhe furnizimi 24 orë i të gjithë territorit nga Ksamili deri në Limion, nga Shelegari deri në Çukë. Brenda këtij 4 vjeçari kjo do të jetë një histori e mbyllur”, përfundoi Koka.
