Kapen dy shqiptarë me 80 kg drogë në Kanalin e Otrantos

Një tjetër rast trafikimi i lëndëve narkotike është goditur nga policia italiane në bashkëpunim me atë shqiptare.

Gjatë këtij aksioni janë vënë në pranga dy trafikantë shqiptarë, si dhe janë sekuestruar 80 kg marijuanë.

Mediat italiane shkruajnë se dy shqiptarët janë arrestuar pas ndjekjes nga policia në ujërat e Kanalit të Otrantos.

Operacioni i Guardia di Finanza ka çuar në arrestimin e dy shqiptarëve nga Durrësi, përkatësisht, T.V 46 vjeç dhe K. B. 18 vjeç.

Pavarësisht manovrave për t’i shpëtuar policisë, ata janë ndaluar dhe në bordin e gomones policia gjeti lëndën narkotike.

Policia sekuestroi drogën e cila kapte vlerën e 700 mijë eurove,  si dhe konfiskoi gomonen 5 metra të gjatë me dy motorë që mbante një flamur italian, që ishte e pa pajisur me dokumente.

Ky është operacioni i pestë antidrogë i kryer nga bashkëpunimi i dy forcave policiore të shteteve fqinje.