KESH: Bilanci energjitik është rritur me rreth 437.000 MWH

Sasia e lartë e reshjeve gjatë dy javëve të para të muajit janar ka përmirësuar ndjeshëm situatën hidroenergjitike në HEC-et e Kaskadës së Drinit.

Bilanci energjitik është rritur me rreth 437.000 MWH. Sipas të dhënave të bëra publike nga kompania KESH, rezerva energjitike është shtuar me 368.000 MWh krahasuar me fundvitin e 2015-ës.

Niveli i HEC Fierzës është rreth 11.32 metra më lartë se niveli më datën 31 Dhjetor 2015. KESH depozituar rreth 44.900 MWh në KEK në kuadër të marrëveshjes së përbashkët, ndërsa rreth 24.000 MWh janë prodhuar për zevendësimimin e sasisë së energjisë që ishte kontraktuar për tu importuar.

Aktualisht importi është ndalur dhe KESH po shfrytëzon maksimalisht prurjet në basenet e HEC Koman dhe HEC Vau i Dejës, duke prodhuar energji me të gjithë agregatët disponibël në këto dy HEC-e për të plotësuar nevojat e vendit. HEC Fierza do të mbahet e stakuar për të rritur rezervën energjitike duke akumuluar prurjet (me përjashtim të rasteve kur sistemi do të kërkojë më shumë energji).

Nga të dhënat e sektorit të operimit dhe monitorimit të kaskadës në KESH, llogaritet që në mesditën e sotme, niveli i HEC Fierzë të ketë arritur 287.18 m dhe prurjet rreth 800 m3/sek. Niveli në HEC Koman llogaritet 173.70 m dhe prurjet anësore janë rreth 350 m3/sek. Niveli në HEC Vau i Dejës llogaritet 75.01 m dhe prurjet anësore rreth 120 m3/sek. Korporata Elektroenergjitike Shqiptare garanton se situata është plotësisht nën kontroll.