Këshilltarët e LDK-së në Prishtinë: Sjellje e Ahmetit është thirrje për anarki
Grupi i LDK-së në Kuvendin e Prishtinës konsideron se kryeqyteti i Kosovës dhe institucionet e shtetit po sulmohen nga brigadat e molotovëve, nga protestuesit e dhunshëm të organizuar nga Vetëvendosja dhe aleatët e saj opozitarë kundër Republikës.
Ky grup thotë se sot nga të gjithë po shihet qartë përpjekja për rrënimin e institucoioneve të shtetit me dhunë. “Grupi i LDK-së konsideron se rëndimit të situatës politike dhe protestave të dhunshme në kryeqytet po u kontribuon pjesëmarrja e kryetarit Shpend Ahmeti dhe udhëheqësve të tjerë të Komunës së Prishtinës, të cilët kanë mobilizuar të gjithë aktivistët politikë, drejtorë drejtorish, këshilltarë dhe eksponentë të tjerë të VV të udhëhequr nga vetë kryetari i Prishtinës për rrënimin e Republikës”, thuhet në reagimin e LDK-së.
Pjesëmarrja e kryetarit të Prishtinës Shpend Ahemti në këto protesta, sipas grupit të LDK-së në Kuvendin Komuna të Prishtinës, është përkrahje e brigadave të molotovëve që po i japin kryeqytetit pamje, me imazhin më të keq, në përpjekje për rrënimin e shtetit edhe nga vetë udhëheqësit e kryeqytetit.
“Kjo sjellje e të parit të Prishtinës është thirrje për anarki”, theksohet në këtë reagim.
Grupi i LDK-së në Kuvendin e Prishtinës thotë se është kundër protestave të dhunshme në kryeqytet dhe e fton kryetarin e Prishtinës dhe eksponentët e tjerë të VV që të mos u rrinë në krah brigadave të molotovëve, atyre që po bëjnë përpjekje ta djegin shtetin nga kryeqyteti, nga kryeqyteti i udhëhequr nga nënkryetari i VV Shpend Ahmeti.
“Grupi i LDK-së i fton qytetarët e kryeqytetit të mos u ekspozohen imazheve të dhunës së mundshme, të cilat po i japin kryeqytetit pamje anarkie, të papranueshme për qytetarët e Prishtinës”, përfundon ky reagim.
