Kievi: Rusia po sulmon infrastrukturën digjitale të Ukrainës me të njëjtin intensitet si rrjetin energjetik

Rusia po e sulmon infrastrukturën digjitale të Ukrainës me të njëjtin intensitet si rrjetin e saj energjetik, deklaroi të premten kryeministri ukrainas, siç njofton Reuters, duke u bërë thirrje agjencive shtetërore që të formojnë shpejt ekipe të sigurisë kibernetike.

Në një deklaratë, Sergiy Koretskyi tha se vetëm muajin e kaluar Rusia goditi 10 qendra të dhënash në kryeqytetin Kiev. Ai paralajmëroi se po rriten edhe sulmet kibernetike me ndihmën e inteligjencës artificiale ndaj sistemeve shtetërore të informacionit dhe ndaj bizneseve.

“Rusia po e sulmon infrastrukturën tonë digjitale po aq sistematikisht sa po sulmon sektorin tonë energjetik”, tha Koretskyi. “Agjencitë kryesore digjitale janë tashmë në gjendje t’i zmbrapsin sulmet duke përdorur inteligjencën artificiale. Pres të njëjtën gatishmëri nga çdo agjenci dhe institucion shtetëror”, shtoi ai.

Sipas Reuters, forcat e Moskës kanë nisur të godasin infrastrukturën energjetike të Ukrainës në prag të dimrit, pas një fushate verore goditjesh në zgjerim ndaj logjistikës, bizneseve dhe qendrave të të dhënave. Edhe Ukraina, nga ana e saj, i ka zgjeruar goditjet nga industria energjetike e Rusisë te gjigantët e tregtisë elektronike.

Reuters vëren se Kievi po përpiqet me vështirësi të zmbrapsë raketat balistike dhe dronët reaktivë që përdoren në këto sulme, mes mungesës së armëve të mbrojtjes kundërajrore. Disa nga aftësitë mbrojtëse dhe luftarake të Ukrainës janë penguar edhe nga kufizimet e fundit në përdorimin e shërbimit satelitor amerikan Starshield.