Kina kryeson listën botërore të superkompjuterëve me “LineShine” në vend të parë

Një superkompjuter në Kinë ka arritur të zërë vendin e parë në botë, duke u renditur si sistemi më i fuqishëm kompjuterik global, sipas listës më të fundit TOP500. Për herë të parë që nga viti 2017, një superkompjuter kinez kryeson këtë renditje, e cila shpesh shihet si tregues i fuqisë teknologjike të vendeve.

Sistemi i quajtur “LineShine”, i vendosur në Shenzhen, ka kaluar superkompjuterin amerikan “El Capitan”, i cili më parë mbante vendin e parë. Sipas të dhënave, LineShine ka arritur një kapacitet prej rreth 2.198 exaflops, që do të thotë se mund të kryejë mbi 2 kuintilionë veprime në sekondë.

Superkompjuterët përdoren kryesisht për kërkime shkencore dhe analiza të mëdha të të dhënave, duke ndihmuar në fusha si zhvillimi i ilaçeve, parashikimi i motit, studimi i klimës. Ata janë gjithashtu një mjet kyç në zhvillimin e inteligjencës artificiale.

Ajo që e dallon superkompjuterin kinez është përdorimi i procesorëve klasikë CPU në vend të teknologjisë GPU që përdoret zakonisht për inteligjencën artificiale. Ai konsumon një sasi të madhe energjie, rreth 42 megavat.

Ndërkohë, në listën TOP500, SHBA vazhdon të ketë disa superkompjuterë në pozicionet kryesore, ndërsa Europa përfaqësohet me disa sisteme të fuqishme në Gjermani, Itali, Zvicër dhe vende të tjera.

Ekspertët thonë se gara për superkompjuterët po bëhet gjithnjë e më e rëndësishme, pasi lidhet drejtpërdrejt me zhvillimin e inteligjencës artificiale dhe teknologjive të së ardhmes.