«Klara and the Sun» mban premierën botërore në Londër: Jenna Ortega si robotja që u mëson njerëzve humanizmin

Filmi “Klara and the Sun” i regjisorit Taika Waititi mbajti të enjten premierën botërore në Festivalin e Filmit në Londër, siç njofton Reuters. Drama distopike bazohet në romanin bestseller të vitit 2021 të shkrimtarit nobelist Kazuo Ishiguro dhe zhvillohet në një të ardhme të përparuar teknologjikisht.

Jenna Ortega interpreton Klara-n, një modele të vjetruar të “Artificial Friend” — një androide shoqëruese, afati i përdorimit të së cilës po i afrohet fundit — derisa e blejnë adoleshentja Josie, e interpretuar nga Mia Tharia, dhe nëna e saj, e interpretuar nga Amy Adams. Klara është programuar për të parandaluar vetminë, beson në fuqinë shëruese të diellit dhe përfundon në një familje të shënuar nga pikëllimi dhe misteri.

Në premierën londineze, Ortega e quajti historinë shumë aktuale për kohën, duke theksuar se përgjigjja ndaj vetmisë gjendet gjithmonë te njëri-tjetri dhe te dëgjimi i njëri-tjetrit. Waititi, i cili e ka drejtuar filmin, është bashkëskenarist dhe producent i tij, shpjegoi se Klara është një makinë që hyn në botën e një familjeje të thyer dhe u mëson anëtarëve të saj rëndësinë e të qenit njeri.

Regjisori shtoi se tema është jetike në një moment kur njerëzimi rrezikon të humbasë kontrollin mbi marrëdhënien me teknologjinë, dhe se filmi synon t’i kujtojë publikut të lërë pajisjet mënjanë e të jetë pranë njerëzve të dashur. Edhe pse ka shtuar nota nga humori i tij karakteristik, Waititi tha se ka dashur të ruajë ndjenjën e thellë dramatike të romanit dhe e quajti atë ndoshta filmin e tij më dramatik.

Në kast bëjnë pjesë edhe Natasha Lyonne, Steve Buscemi, Aran Murphy dhe Rachel House. “Klara and the Sun” del në kinematë e botës nga 21 tetori.