Klekovski takohet në Koçan me të lënduarit e zjarrit në “Puls”: Shteti është këtu për një rrugë të gjatë

Ministri i Shëndetësisë Sasho Klekovski është takuar mbrëmë në Koçan me të lënduarit nga zjarri në diskotekën “Puls”, siç njofton Fokus. Për takimin informoi vetë ministri në faqen e tij në Facebook.

“Shteti është këtu – për një rrugë të gjatë”, thekson Klekovski në postim, duke shtuar se në takim është biseduar për gjendjen e të lënduarve, për nevojat e tyre dhe për kujdesin që u nevojitet edhe në të ardhmen, sipas raportimit të Fokus.

Klekovski bëri të ditur se ua ka prezantuar të lënduarve mundësitë dhe hapat e ardhshëm të trajtimit. Në takim kanë marrë pjesë edhe d-r Katerina Mirçovska dhe d-r Gordana Georgieva nga grupi i punës i Ministrisë së Shëndetësisë, qëllimi i të cilit është vlerësimi, këshillimi, organizimi dhe ndjekja e trajtimeve të secilit pacient.

Sipas ministrit, puna e këtij grupi është baza për një kujdes të mëtejshëm të përshtatur me nevojat e secilit pacient. Në takim ka marrë pjesë edhe kryetari i komunës së Koçanit, Vlladko Grozdanov, siç njofton Fokus.