Në kuadrin e një vizite dyditore në Bruksel, ministri i Jashtëm Ditmir Bushati është takuar me raportuesin për Shqipërinë në Parlamentin Europian, Knut Fleckenstein, i cili do të prezantojë raportin për Shqipërinë në Komisionin e Punëve të Jashtme të Parlamentit Europian në 16 shkurt. Në qendër të vëmendjes së raportit “Fleckenstein” është reforma në drejtësi. Fleckenstein thotë për ABC News, se nëse reforma në drejtësi aprovohet me shumicën e kërkuar dhe bëhen të gjithë ndryshimet e nevojshme në Kushtetutë, atëherë Komisioni Europian duhet të hapë dritën jeshile për hapjen e negociatave të anëtarësimit të Shqipërisë në BE.
Ju keni insistuar vazhdimisht në raportet për Shqipërinë mbi rëndësinë e refomës së drejtësisë dhe çdo herë që keni vizituar Tiranën së bashku me zotin Kukan. Këtë rradhë në Tiranë ju propozuat që Komisioni Europian të monitorojë zbatimin e reformës së gjyqësorit. A keni qenë në kontakt me komisionerin Hahn për këtë?
Për momentin është sugjerimi im për Komisionin e Punëve të Jashtme, që Komisioni Europian të monitorojë zbatimin e reformës së gjyqësorit, sepse nuk ka asgjë më të rëndësishme, sesa kjo reformë. Nuk është se ne duhet të zgjedhim ose reformën e drejtësisë, ose luftën kundër krimit të organizuar dhe korrupsionit. Kjo pasi nëse aprovohet reforma në drejtësi dhe fillon zbatimi i saj, që në fakt kërkon kohë, atëherë kjo është një bazë e shëndoshë për luftën kundër korrupsionit dhe krimit të oprganizuar. Nëse nuk eksiston një sistem drejtësie i pavarur, mund të arrihen objektiva të vogla, por jo të bëhen hapa të mëdha. Dhe në Shqipëri nevojiten hapa të mëdha përpara, siç thonë të gjithë politikanët dhe më shumë se 90% e popullatës, nëse jam i mirëinformuar.
Ju lini të kuptohet që reformë në drejtësi është ajo që do bëjë diferencën për hapjen e negociatave të anëtarësimit. Ndërkohë, ka zëra të tjerë të përcjellur në shtypin e huaj, sipas të cilëve kërkohet së pari të testohet aftësia e partive politike shqiptare për zgjedhje sipas standarteve dhe pastaj të hapen negociatat. Ç’mendoni ju për këtë?
Nuk e di, se nga vijnë këto, por s’ka kuptim. Unë do të thosha, që nëse aprovohet reforma në drejtësi me shumicën e nevojshme dhe të gjitha ndryshimet e duhura në Kushtetutë, atëherë duhet të ketë një sinjal të qartë nga Komisioni Europian drejtuar Këshillit të Ministrave për hapjen e negociatave të anëtarësimit të Shqipërisë në BE. Nuk e di se kur do të ndodhë kjo, por duhet të ketë një vendim për hapjen e negociatave dhe pastaj puna të vazhdohet nga kushdo që të jetë në pushtet në qeverinë e ardhshme.
Komisioneri Hahn ka theksuar së fundmi që nuk është i rëndësishëm vetëm aprovimi i paketës së reformës në drejtësi, por edhe zbatimi i saj. Nëse reforma aprovohet në pranverë siç përflitet mbeten gjashtë muaj për zbatimin e saj, nëse presim që Komisioni Europian të japë dritën jeshile për hapjen e negociatave. A ju duket kohë e mjaftueshme?
Jo, nuk është kohë e mjaftueshme. Nëse komisioneri është i arsyeshëm dhe unë mendoj, se ai është i tillë, do të ishte jorealiste që të prisnim hapjen e negociatave kur reforma të zbatohej tërësisht. Reforma duhet aprovuar me shumicën e kërkuar, që do të thotë të dyja palët, qeveria dhe opozita dhe duhet të fillojë zbatimi i saj. Atëherë do të jetë momenti për hapjen e negociatave të anëtarësimit të Shqipërisë në BE. Gjatë negociatave, çështjet e forcimit të shtetit ligjor dhe të drejtave themelore do të jenë pjesë e negociatave. Aprovimi i reformës së gjyqësorit nuk është dhe aq i lehtë, por zbatimi i saj do të jetë edhe shumë me i vështirë.
Sa e rëndësishme është për ju zbatimi i ligjit të dekriminalizimit? Kjo është pjesë edhe e raportit tuaj.
Eshtë diçkja pozitive që ky ligj u aprovua, edhe pse mori shumë kohë. Zbatimi mund të marrë pak kohë, por për ne është e qartë, që nëse ka një vullnet të qartë nga të gjitha partitë politike, s’duhet të zgjasë shumë. Nga ana tjetër, jo çdo rast mund të mbulohet nga një ligj. është edhe përgjegjësia juaj si media për të treguar nëse ka raste të dyshimta dhe pastaj votuesit duhet të votojnë. Në fund të fundit, ju takon politikanëve që të tregojnë përgjegjësinë e tyre. Ndal blerjes së votës për ata që e bëjnë këtë. Mos krijoni atmosferë presioni dhe kërcënimi nëse zgjedhësit nuk votojnë për njërin ose tjetrin drejtim. Qytetarët shqiptarë duhet të votojnë vetëm për politikanë të besueshëm dhe që ofrojnë zgjidhje konkrete për përmirësimin e situatës dhe jo për ata që kërkojnë vetëm pushtet dhe nëse është e nevojshme ata e blejnë këtë pushtet. Kjo nuk është çështje për një parti të vetme, por për politikanët kudo që janë.
