Komisioni i Shëndetësisë kërkon raportim nga ministri Vitia, Reshitaj: Të sqarohet ku shkuan mbi 1.8 miliardë euro

Komisioni parlamentar për Shëndetësi ka kërkuar që ministri i Shëndetësisë, Arben Vitia, dhe përfaqësuesit e SHSKUK-së të raportojnë para deputetëve, në një debat ku opozita kërkoi llogaridhënie për mënyrën se si janë shpenzuar mjetet e ndara për këtë sektor, siç raporton Ekonomia Online.

Deputetja e Lidhjes Demokratike të Kosovës, Albena Reshitaj, kundërshtoi vlerësimin se është herët për ta ftuar ministrin në raportim, duke thënë se një gjë e tillë është dashur të bëhet më herët. Ajo theksoi rëndësinë e transparencës dhe llogaridhënies në sektorin e shëndetësisë, duke rikujtuar se gjatë pesë vjetëve të fundit për shëndetësinë janë ndarë mbi 1.8 miliardë euro. “Janë mbi 1.8 miliardë euro që janë dedikuar për shëndetësi këto pesë vjet dhe është shumë me rëndësi nëse ato kanë arritur në përmirësimin e shërbimeve shëndetësore për pacientët”, tha Reshitaj, sipas raportimit të Ekonomia Online.

Ndërkaq, deputeti i Lëvizjes Vetëvendosje, Egzon Azemi, deklaroi se programi qeveritar ishte prezantuar disa herë në Kuvend, por zbatimi i tij ishte penguar nga zgjedhjet e njëpasnjëshme. Ai tha se tashmë institucionet janë funksionale dhe secila ministri e ka të qartë planin që duhet të zbatojë.

Ndaj deklaratës së tij reagoi deputetja e PDK-së, Blerta Deliu, e cila tha se diskutimi nuk duhet të përqendrohet te programet elektorale, por te vizioni i qeverisë dhe qartësia e objektivave për sektorin e shëndetësisë. Deliu kërkoi që qeveria të paraqesë një program të qartë qeverisës, të shoqëruar me agjendë parlamentare.

Kryetari i komisionit, Uran Ismaili, vlerësoi se raportimi i ministrit të Shëndetësisë është i nevojshëm për të shqyrtuar punën e deritashme dhe planet për të ardhmen. Ai ngriti edhe shqetësimet e qytetarëve për furnizimin me insulinë, duke theksuar se ministrit duhet t’i jepet mundësia të raportojë para komisionit dhe të japë llogari për veprimet e tij. Ismaili theksoi se ministri Arben Vitia nuk është i ri në këtë pozitë dhe se duhet të sqarojë para deputetëve çfarë është bërë deri më tani dhe cilat janë masat e planifikuara për përmirësimin e shërbimeve shëndetësore.