Kompletohet qeveria e unitetit në Irak
Parlamenti irakian ka kompletuar qeverinë e re të vendit, duke miratuar këtë të shtunë emrat e ministrave të Brendshëm dhe të Mbrojtjes, pas disa javësh shtyrjeje.
Mohamed Salem al Ghabban, me etni shiite, u caktua ministër i Brendshëm, ndërsa Khaled al Obeidi, sunit, u konfirmua në krye të dikasterit të Mbrojtjes.
Votimi parlamentar i dy ministrave do të sjellë një lehtësim si brenda edhe jashtë Irakut, pasi shënon zhbllokimin e ngërçit disajavor, deklaroi redaktori i çështjeve arabe të BBC, Sebastian Usher.
Një kabinet i ri e më gjithëpërfshirës shihet si një hap i rëndësishëm përpara në luftën për frenimin e militantëve të ISIS-it, sidomos mes minoritetit sunit iraken.
Kryeministri i mëparshëm Nouri al Maliki u detyrua të dorëhiqej në muajin gusht, pasi arabët sunitë dhe komunitetet kurde akuzuan administratën e tij për ndjekje të politikave sektare.
Qeveria e re, e udhëhequr nga Haidar al Abadi, u betua më 8 shtator dhe ajo ka dy zëvendëskryeministra, një sunit dhe një kurd.
Gjithësesi, postet kyçe të ministrit të Brendshëm dhe atij të Mbrojtjes nuk ishin plotësuar deri këtë të shtunë, me emërimet e mëparshme të zotit Abadi që ishin hedhur poshtë nga Parlamenti.
Forcat qeveritare irakene, të mbështetura nga sulmet ajrore amerikane, po luftojnë militantët e ISIS-it në afërsi të Ramadit, kryeqytet i provincës së Anbarit, si dhe për qytetin e Tikritit, që u mor nga rebelët më herët gjatë vitit.
