Kosovë, takim i koalicionit paszgjedhor me VV-në për marrëveshje ose jo
Liderët e koalicionit të pas zgjedhjeve parlamentare të parakohshme të 8 qershorit, LDK-së, AAK-së e Nisma-s, si dhe i subjektit që ka deklaruar mbështetje të kushtëzuar -Vetëvendosjes, kanë nisur sot një takim ku pritet epilogu se a do kenë apo jo marrëveshje. Ditëve të fundit, në media kanë qarkulluar dy draft-marrëveshje për koalicion në mes bllokut LDK-AAK-Nisma dhe Lëvizjes Vetëvendosje.
“Drafti i parë është propozimi i Lëvizjes Vetëvendosje, ndërsa i dyti është njëri nga draftet e grupit të punës. Në këto dokumente ka pika për të cilat është arritur pajtim, sikurse që ka pika për të cilat nuk pajtohemi”, ka sqaruar VV, duke paralajmëruar se, “marrëveshja e plotë apo jo, do të vendoset në takimin e liderëve”.
Takimi ishte paralajmërur për ditën e djeshme, por është shtyrë për sot me kërkesë të koalicionit paszgjedhor LDK-AAK-Nisma.
Këtë javë, në 17 korrik, mbahet seanca konstituive e Kuvendit të Kosovës, ku koalicioni paszgjedhor synon ta ketë shumicën për zgjedhjen e kryeparlamentarit, e pastaj edhe për formimin e qeverisë së re, por situata e numrave në Kuvend ende është e paqartë.
