«Krasner and Pollock» në The Met: sigurimi i veprave kap 3 miliardë dollarë, por pa dëmshpërblim federal

Muzeu Metropolitan i Artit në Nju Jork ka hapur ekspozitën më të madhe të vjeshtës, «Krasner and Pollock: Past Continuous», kushtuar dy gjigantëve të ekspresionizmit abstrakt, Lee Krasner (1908–1984) dhe Jackson Pollock (1912–1956). E hapur më 4 tetor 2026 në The Met Fifth Avenue dhe që qëndron deri më 31 janar 2027, ekspozita bashkon mbi 120 vepra nga më shumë se 80 huadhënës në Shtetet e Bashkuara dhe në botë — mes tyre muze si Guggenheim, Whitney dhe MoMA në Nju Jork, Tate në Londër dhe Centre Pompidou në Paris, siç njofton Artnet.

Por detaji që po tërheq vëmendjen e botës së artit këto ditë nuk është vetëm përmasa e ekspozitës: sipas USA Art News, vlera e siguruar e veprave të huazuara mund të kapë 3 miliardë dollarë, ndërkohë që muzeu nuk përdori dëmshpërblimin federal amerikan (US indemnity) — programin qeveritar që mbulon zakonisht huazimet ndërkombëtare me vlerë të madhe. Kolumna “The Art Detective” e Artnet, nga Katya Kazakina, e përshkruan montimin e ekspozitës si një “përpjekje herkuliane”, me kryevepra të sjella nga e gjithë bota.

Ekspozita është prezantimi i parë i madh në Nju Jork kushtuar secilit prej dy artistëve në më shumë se 20 vjet, dhe nёntitulli i saj, «Past Continuous», merret nga një pikturë e vitit 1976 e Krasner-it. Kuratorët David Breslin dhe Brinda Kumar e ndërtuan rrëfimin kronologjikisht, duke ndjekur karrierat paralele të çiftit — që u takuan në vitin 1942 në një ekspozitë të organizuar nga artisti John Graham, u martuan në 1945 dhe u zhvendosën në Springs të Long Island, ku mbetën bashkë deri në vdekjen e Pollock-ut në 1956 — siç shkruan The Art Newspaper.

Synimi është ripozicionimi i Krasner-it si e barabartë artistike e Pollock-ut, e jo thjesht “gruaja e Pollock-ut”: tre dekadat pas vdekjes së tij shënuan periudhën më prodhuese të karrierës së saj, dhe kolazhet — me të cilat ekspozita hapet e mbyllet — tregojnë se si ajo ripërdori vizatimet e hershme të saj dhe të Pollock-ut për të ndërtuar vepra të reja, një mënyrë “të shikosh pas për të ecur përpara”, siç e përshkruan kuratorja Kumar.

Interesi ndërkombëtar për Krasner-in po rritet: më 19 tetor, Gagosian në Paris hap ekspozitën e parë solo të artistes në Francë, «Lee Krasner: Works from the 1960s», e përqendruar te veprat e viteve ’60, siç njofton galeria.