Kremlini: po punohet për të lehtësuar krizën humanitare në Oleshky, Putini e diskutoi situatën me Trumpin

Kremlini tha të martën se po punohet për të lehtësuar situatën humanitare në qytetin Oleshky në jug të Ukrainës, nën kontrollin rus, ku banorët kanë raportuar një krizë ushqimore në përkeqësim, siç njofton Reuters.

Zëdhënësi i Kremlinit, Dmitry Peskov, u tha gazetarëve se presidenti Vladimir Putin e kishte diskutuar situatën në Oleshky me presidentin amerikan Donald Trump dhe i kishte thënë se komisionerja ruse për të drejtat e njeriut është angazhuar në këtë çështje.

Sipas Reuters, Putini i kishte thënë Papa Leos në një bisedë telefonike të premten se e mbështet nismën e Vatikanit për dërgimin e furnizimeve për civilët në Oleshky dhe është i gatshëm të bashkëpunojë për këtë çështje. Papa Leo i telefonoi të hënën edhe presidentit ukrainas Volodymyr Zelensky, duke i kërkuar që Ukraina dhe Rusia të bashkëpunojnë për ndihmat në qytet.

Rusia dhe Ukraina akuzojnë njëra-tjetrën për bllokimin e furnizimeve për popullsinë e Oleshky-t, qytetin në bregun lindor të lumit Dnipro në rajonin e Khersonit, të cilin forcat ukrainase kërkojnë ta rimarrin. Sipas një zyrtari ukrainas për të drejtat e njeriut, rreth 2.000 banorë të qytetit kanë muaj që janë shkëputur nga ushqimet dhe ilaçet.

Deklarata e së martës është përgjigjja e parë publike e Moskës pas apelit të Vatikanit, por Kremlini nuk dha hollësi se kur dhe si do të mbërrijnë furnizimet në qytet.