Kremlini: Rusia e gatshme në parim të rifillojë bisedimet trepalëshe me Ukrainën dhe SHBA-në në nëntor

Këshilltari i Kremlinit për politikën e jashtme, Yuri Ushakov, tha të mërkurën se presidenti rus Vladimir Putin i ka thënë të dërguarit të posaçëm amerikan Steve Witkoff se Moska është e gatshme në parim të rifillojë muajin e ardhshëm bisedimet me Ukrainën dhe Shtetet e Bashkuara për t’i dhënë fund luftës në Ukrainë.

Sipas Reuters, Ushakov e bëri njoftimin pas takimit të së mërkurës mes Putinit dhe Witkoff-it në Shën Petersburg, duke theksuar se bisedime të tilla trepalëshe nuk janë zhvilluar që nga shkurti. Sipas raportimeve pas takimit, rifillimi i negociatave pritet në dhjetëditëshin e dytë të nëntorit, pas datës 10.

Raundi i ri i bisedimeve, sipas Ushakovit, duhet të përqendrohet në “ndërtimin e një sistemi sigurie për Rusinë dhe Ukrainën pas përfundimit të konfliktit”, pra te garancitë e sigurisë për të dyja palët pas luftës. Witkoff e njoftoi Putinin për bisedimet e së martës në Oslo, ku amerikani u takua me presidentin ukrainas Volodymyr Zelensky, kryeministrin norvegjez dhe presidentin finlandez; sipas Ushakovit, Witkoff vuri në dukje qasje të reja nga evropianët dhe Kievi, por tha se ato nuk përmbanin shumë elemente të dobishme për zgjidhjen e krizës ukrainase.

Takimi në Shën Petersburg zgjati pothuajse tri orë dhe, siç njofton Reuters, në të u diskutua edhe zbatimi i marrëveshjes së 9 tetorit mes Putinit dhe presidentit amerikan Donald Trump për furnizimet me dizel rus në tregjet amerikane dhe botërore, si edhe kriza e Iranit. Putini theksoi se potenciali i diplomacisë me Teheranin nuk është shteruar dhe se Rusia riafirmoi gatishmërinë për të ndihmuar në kërkimin e zgjidhjeve politike dhe diplomatike për çështjen iraniane.

Njoftimi i Kremlinit vjen në ditën kur presidenti ukrainas Volodymyr Zelensky, në një intervistë për Fox News, mbështeti ngrirjen e luftimeve dhe negociatat trepalëshe mes liderëve të Kievit, Uashingtonit dhe Moskës, duke theksuar se për Ukrainën nuk duhet vendosur pa Ukrainën.