Krishtlindjet ortodokse-Pelegrinët serbë priten me protesta në Gjakovë, arrestohet një person
Një grup qytetarësh në Gjakovë janë mbledhur para Kishës Ortodokse të qytetit për të kundërshtuar ardhjen e pelegrinëve serbë me rastin e Krishtlindjeve Ortodokse.
Ata po kundërshtojnë që persona që dikur morën pjesë në luftën e Kosovës të rikthehen në Gjakovë, vendin ku u bënë shumë krime gjatë luftës së 99 –ës.
Sanije Berisha, djali i të cilës është vrarë në luftë tha se në Gjakovë ka ndodhur Sebrenica.
“Do të rri këtu. Nuk e dini në Gjakovë është Sebrenica. Nuk i lejoj të kalojnë sepse ma kanë vrarë djalin 17 vjeçar”, tha ajo.
Protestuesit po ndalohen nga Policia e Kosovës dhe të pranishëm po shihen edhe pjesëtarë të njësisë speciale.
Gazetari i KosovaPress i cili gjendet në vendin e ngjarjes raporton se si pasojë e ndërhyrjes së Policisë dhe e kundërshtimit nga ana e qytetarëve është arrestuar një prej protestuesve.
Pas ndërhyrjes policia ka arritur t’i largojë protestuesit nga hyrja e kishës duke i zhvendosur në një distancë më të largët.
