Kryeministri kinez Li Qiang takon zv/presidentin iranian Aref në Dushanbe: Kina do të vazhdojë të nxisë paqen në Lindjen e Mesme

Kryeministri i Kinës, Li Qiang, u takua të hënën në Dushanbe me zv/presidentin e parë të Iranit, Mohammad Reza Aref, në margjinat e takimit të Organizatës së Bashkëpunimit të Shangait. Siç njofton agjencia Xinhua, Li tha se Kina, duke u mbështetur në frymën e nismave dhe propozimeve të presidentit Xi Jinping, do të vazhdojë të punojë për të nxitur paqen, stabilitetin dhe zhvillimin në rajonin e Lindjes së Mesme.

Sipas të njëjtit raportim, Li theksoi se Kina ka bërë çdo përpjekje për të inkurajuar paqen dhe për të nxitur dialogun. Siç raporton Reuters duke cituar median shtetërore kineze, kryeministri kinez i tha Aref-it se sovraniteti dhe siguria e të gjitha vendeve duhet të respektohen.

Gjithnjë sipas këtij raportimi, Li u bëri thirrje të gjitha palëve të ndjekin dialogun dhe zgjidhjet diplomatike për mosmarrëveshjet rajonale, ndërsa riafirmoi gatishmërinë e Kinës për të zgjeruar bashkëpunimin dhe shkëmbimet me Iranin në disa sektorë.