Kryeministri Rama intervistë për televizionin serb N1

Kryeministri Edi Rama, gjatë qëndrimit të tij në Beograd, ka dhënë një intervistë për televizionin rajonal në gjuhën serbe N1.

Me anë të një postimi në rrjetin social “Facebook” , Kryeministri Rama thekson se disa prej temave të trajtuara në këtë intervistë që do të jepet nesër, ishin marrëdhënia e re me Serbinë, Kosova, rajoni, por edhe droni që u ngrit në 14 tetor në Beograd, gjatë ndeshjes mes përfaqësueseve të futbollit Serbi-Shqipëri.

“Intervistë në televizionin rajonal në gjuhën serbe N1 – Marrëdhënia e re me Serbinë, Kosova, rajoni, droni…Jepet nesër”, shkruan Kryeministri Rama në postimin e tij.

Kryeministri Rama kryeson delegacionin shqiptar në Samitin Ekonomik dyditor Kinë-Europa Qendrore dhe Lindore, në Beograd, i njohur si Samiti 16+1 me pjesëmarrjen e kryetarëve të qeverive të 16 vendeve të Europës Qendrore dhe Lindore dhe Kryeministrit të Kinës, Li Keqiang.

Në përbërje të delegacionit shqiptar është edhe ministri i Zhvillimit Ekonomik, Tregtisë dhe Sipërmarrjes, Arben Ahmetaj dhe ministri i Transportit dhe Infrastrukturës, Edmond Haxhinasto.