Kurti: Qeveria që varet nga partia e Beogradit i bën dëm shtetndërtimit

Lideri i Lëvizjes Vetëvendosje, Albin Kurti, tha sot se mënyra se si koalicioni PAN po orvatet që ta krijojë shumicën parlamentare nëpërmjet një qeverie, që do të varet nga partia e Beogradit në Kosovë dhe nga blerja e ndonjë deputeti i bën dëm shtetndërtimit dhe demokracisë në Kosovë.

Kurti tha se të entjen kur pritet të mbahet seanca konstitutive do të jenë në Kuvend. Ai përsëriti qëndrimin e Vetëvendosjes se nuk do e votojnë Kadri Veselin për kryetar të Kuvendit.

“Padyshim që i gjithë grupi parlamentar i VV-së do të jemi të enjten para orës 10:00 në Kuvendin e Republikës. Të enjten Kuvendi duhet ta zgjedh për kryetar një figurë politike sa më gjithëpërfshirëse e kurrsesi kontroverse. Ky deputet që do të bëhet kryetar Kuvendi në legjislaturën e gjashtë duhet të jetë shumë më i mirë se kryetari i Kuvendit në legjislaturën e pestë. Natyrisht se nuk do ta votojmë Veselin”, tha Kurtisot pasi u regjistrua si deputet.

Ai foli edhe për takimet me ambasadorët e shteteve të Quintit ku siç tha ai po diskutohen sfidat e seancës konstituive.

“Ne si përfaqësues të VV-së theksojmë rëndësinë e partneritetit me shtetet e perëndimit e në veçanti me ShBA-të dhe Gjermaninë”, tha Kurti.

Ndërsa sa  i përket takimeve të VV me LDK-në, Kurti theksoi se “ne kemi pasur disatakime, por jo mjaftueshëm. Dhe besoj që ato do të intensifikohen në ditët në vijim e veçanërisht pas 3 gushtit”.