Kush është Selman Abedi, kamikazi 23-vjeçar i Mançesterit
Salman Abedi, atentatori që hodhi veten në erë në Mançester, sipas burimeve të shtypit britanik, kishte pak kohë që ishte kthyer nga një udhëtim në Libi. Një mik i tregoi gazetës “Times”, që i riu ishte nisur tre javë më parë dhe ishte kthyer para 12 ditësh në Britani.
22-vjeçari, djali i një refugjati libian, mund të ketë udhëtuar edhe në Siri dhe aty mund të ketë përgatitur sulmin e së hënës nën drejtimin e xhihadistëve të ISIS-it.
Të martën, policia ka kontrolluar banesën e Abedi në Fallowfield, në zonën perëndimore të Mançesterit dhe ka arrestuar të vëllain, Ismael, 23 vjeç, i cili po mbahet akoma në paraburgim. Policia dhe inteligjenca britanike tani duan të kuptojnë nëse 22-vjeçari në Libi është stërvitur nga ndonjë rrjet xhihadist.
Abedi njihej nga shërbimet e sigurisë për marrëdhëniet e tij me Raphael Hostey, 24 vjeç, edhe ai nga Mançester dhe një rekrutues i njohur i Shtetit Islamik, i cili dërgonte njerëz në Siri, por nuk ishte mes 350 xhihadistëve të njohur në listën e policisë pas rikthimit nga konflikti.
