Lavrov: Moska kërkon diskutime për një armëpushim të menjëhershëm

Ministri rus i Punëve të Jashtme theksoi sot se nuk do të ketë ndërhyrje ushtarake ruse në Ukrainë dhe shtoi se një armëpushim i menjëhershëm dhe pa kushte paraprake duhet të diskutohet në bisedimet e parashikuara në Bjellorusi mes përfaqësuesve të Kievit dhe Moskës.
“Nuk do të ketë ndërhyrje ushtarake, ne jemi për një zgjidhje paqësore të kësaj krize të rëndë, të kësaj tragjedie”, deklaroi Lavrov, gjatë një takimi me studentët rusë.

“Gjithçka që ne bëjmë parashikon vetëm avancimin e një afrimi politik në zgjidhjen e situatës në Ukrainë ku luftimet e ashpra kanë vendosur përballë ushtrinë ukrainase me rebelët prorusë”, nënvizoi ministri rus.
Ai theksoi se një armëpushim i menjëhershëm dhe pa kushte paraprake duhet të jetë çështja kryesore e diskutimeve në Minsk ku do të mblidhet sot një grup kontakti mbi krizën në Ukrainë, që përfshin veçanërisht përfaqësuesit e Kievit, Rusisë dhe Organizatës për Siguri dhe Bashkëpunim në Evropë (OSBE).