LDK-AAK-Nisma ecin drejt “Srpska”-s

Bllokut opozitar, LDK-AAK-Nisma nuk po i ngutet më që të bëjë koalicion me Lëvizjen Vetëvendosje. Kjo e fundit për ditë të tëra u lut nga blloku opozitar që të jetë pjesë e institucioneve të ardhshme të Kosovës. Madje koalicioni kishte lëshuar pe në shumë kushte të vëna nga partia e Albin Kurtit, kushte të cilat kishin të bënin me dialogun Kosovë-Serbi dhe ndërprerjen e privatizimit.

Kur mendohej se gjithçka po shkonte drejt finalizimit të marrëveshjes, u prish “muhabeti” dhe treshja hoqi dorë nga nënshkrimi i marrëveshjes për të cilën ishin dakorduar një ditë më parë.

Përfundimi i seancës konstituive duket se ka ndryshuar gjërat.

Burime të gazetës Tribuna bëjnë të ditur se arritja e një marrëveshje në parim në mes të bllokut opozitar me minoritetet e përfaqësuara në Kuvend, sidomos me Listën “Srpska”’, i ka relaksuar bukur mirë drejtuesit e treshes LDK-AAK-Nisma.

Afrimi me minoritetet ka bërë që drejtuesit e bllokut të heqin dorë nga pranimi i disa kushteve të Vetëvendosjes, kushte të cilat sipas burimit do të ndikojnë edhe në mosarritjen e marrëveshjes së paralajmëruar një ditë para mbajtjes së seancës konstituive.

Madje sipas të njëjtave burime, blloku opozitar nuk është më fare i interesuar as që t’i vazhdojë bisedimet përmes grupeve punuese me Vetëvendosjen, përmes të cilave synohej që të gjendej një kompromis për të bashkëqeverisur.