Legalizimi i kolonive në Izrael, miratohet ligji në parim

Parlamenti izraelit miratoi paraprakisht një ligj kontradiktor që legalizon mijëra shtëpi të ndërtuar në Bregun e pushtuar Perëndimor.

Mbështetësi kryesor i ligjit, ministri i Arsimit Naftali Bennet, tha se ky është fillimi i aneksimit të shumicës së këtij territori, që pretendohet nga izraelitët dhe palestinezët.

Por kritikët e izraelit dhe palestinezët thonë se bëhet fjalë për vjedhje toke.

Ligji duhet të kalojë edhe tre lexime të tjera në parlament që të hyjë në fuqi dhe analistët mendojnë se kjo do të ndodhë. Ose, qeveria izraelite mund ta përdorë si mjet presioni për të arritur marrëveshje të tjera.

Nëse ligji hyn në fuqi, rreth 4 000 shtëpi kolonësh izraelitë të ndërtuara pa leje do të legalizohen. Sipas ligjit ndërkombëtar, shtëpitë apo çdo lloj ndërtimi izraelit në tokat e pushtuara, janë ilegale.

Një version i hershëm i këtij ligji arriti në këtë fazë, por më pas dështoi kur politikanët u përballën për çështjen e Amonës, një koloni në bregun perëndimor.

Në versionin e ri të ligji Amona nuk përmendet më dhe është fshirë, gjë që do ët thotë se ndërtimet aty do të shemben pas evakuimit më 25 dhjetor, siç kishte vendosur gjykata e lartë e izraelit.