Lista e shqiptarëve të Preshevës, Bujanocit dhe Medvegjës në pritje të vendimit të RIK-ut

Komisioni Republikan Zgjedhor (RIK) i Serbisë ende nuk ka vendosur për listën zgjedhore të shqiptarëve të Preshevës, Bujanocit dhe Medvegjës për zgjedhjet parlamentare të 25 tetorit, siç njofton gazeta serbe Danas. Sipas njoftimit të kryetarit të Partisë për Veprim Demokratik (PDD), Shaip Kamberi, lista e “Koalicionit Shqiptar” iu dorëzua RIK-ut vonë mbrëmjen e së dielës, pak para mesnate — pra brenda afatit zyrtar.

Kamberi njoftoi dorëzimin e listës përmes një postimi në Facebook, ku falënderoi aktivistët e partive politike për angazhimin dhe çdo shqiptar të Luginës së Preshevës për mbështetjen. Ai theksoi se në një kohë kur shumë gjëra i ndajnë, lufta kundër diskriminimit shtetëror të shqiptarëve duhet t’i bashkojë të gjithë.

“Në këto zgjedhje, për herë të parë, të gjithë të bashkuar në një listë, me mbështetjen e qeverive të Kosovës dhe të Shqipërisë, vazhdojmë luftën me qëllim të qartë që e vërteta e Luginës të jehojë sa më fort”, shkroi Kamberi, sipas raportimit të Danas-it.

Kreu i PDD-së vlerësoi gjithashtu se këtë herë ekziston një mundësi reale që shqiptarët e Luginës së Preshevës të përfaqësohen me më shumë deputetë në Kuvendin e Serbisë.

Afati për dorëzimin e listave zgjedhore skadoi në mesnatë, ndërsa lista përmbledhëse duhet të shpallet më së voni deri më 9 tetor. Sipas Danas-it, RIK-u ka shpallur deri tani 17 lista zgjedhore, prej të cilave njëra është tërhequr.