Lista Studentore: Serbia nuk do të vendosë sanksione ndaj Rusisë — studentët i drejtojnë katër pyetje Vuçiçit

Studentët në bllokadë kanë publikuar sot në profilin e tyre në rrjetin social X “programin studentor për çështjen e politikës së jashtme dhe sanksioneve”, ku theksojnë se Serbia do të vazhdojë të mbajë qëndrimin e saj të vendosur se vendosja e sanksioneve ndaj çdo shteti, subjekti apo individi është shprehje e një qëndrimi politik — dhe nuk dëshmon se masat sanksionuese ndihmojnë në zgjidhjen e sfidave politike dhe të sigurisë, siç njofton gazeta serbe Danas.

“Republika e Serbisë do të mbajë qëndrimin parimor për mosvendosjen e masave kufizuese ndaj Federatës Ruse”, thuhet në deklaratën e studentëve, të cilët si arsye përmendin përvojën historike të vendit dhe ndikimin e drejtpërdrejtë të këtyre masave mbi popullsinë vendase.

Por përveç qëndrimit për Rusinë, studentët kanë shtruar edhe katër pyetje, të cilat, siç shkruan Danas, i drejtohen drejtpërdrejt bartësit të listës zgjedhore të SNS-së, Aleksandar Vuçiçit: Kur do të sanksionohen përgjegjësit për rënien e tendës në stacionin hekurudhor të Novi Sadit? Kur do të publikohen 2 minutat e xhirimeve nga pika e pagesës në Doljevac? Kush është fajtor për (mos)dhënien e Gazivodës? Dhe pse kandidatët e listës, bartës i së cilës jeni ju, sulmojnë dhe rrahin qytetarët?

“Për këto pyetje nuk nevojitet debat, por përgjigje konkrete”, theksojnë studentët në fund të postimit të tyre në rrjetin X.