Lituania kërkon sanksione të BE-së kundër drithit rus

Kryeministri i Lituanisë, Mindaugas Sinkevicius, ka përsëritur thirrjen për Bashkimin Evropian që të vendosë sanksione ndaj drithit rus, si pjesë e përpjekjeve për të prerë burimet e të ardhurave të Moskës.

Komentet e tij, të bëra në Facebook, vijnë si përgjigje ndaj bllokadës së vazhdueshme ruse në Detin e Zi, e cila po pakëson ndjeshëm të ardhurat e Ukrainës nga eksportet ushqimore, siç njofton The Kyiv Independent.

Kievi e ka akuzuar Rusinë për goditjen e anijeve tregtare pranë brigjeve të Detit të Zi të Rumanisë dhe Bullgarisë më 5 dhe 6 tetor, sulme në të cilat u vranë civilë. “Njëkohësisht, Rusia po përdor portet dhe infrastrukturën në Evropë, përfshirë shtetet baltike… Kjo është një situatë e papranueshme, e cila deri tani është toleruar”, tha kryeministri lituanez.

Lituania do të propozojë jo vetëm ndalimin e tranzitit të drithit rus nëpër BE, por edhe shtimin e personave individualë në listën e sanksioneve. Sinkevicius tha se ka urdhëruar kontrolle më të rrepta mbi origjinën e drithit: “Nuk do të lejojmë që makineria ruse e luftës të përfitojë duke përdorur infrastrukturën tonë si portë drejt tregjeve globale.”

I dërguari i BE-së për sanksionet, David O’Sullivan, tha në një intervistë për The Kyiv Independent se sanksionet tashmë e kanë shkurtuar tregtinë e BE-së me Rusinë me 75 për qind.