LSI, Vasili: Debati për reformën të mos na ndajë, por të na bashkojë

Kreu i grupit parlamentar të LSI-së, Petrit Vasili ka deklaruar se “është një moment i një rëndësie të veçantë përfundimi i miratimit të paketës së 7 ligjeve të reformës në drejtësi”.
Vasili theksoi se kjo reformë ishte edhe tema e vetme e takimit të djeshëm të tij me ambasadorin e SHBA-së, Donald Lu, dhe ambasadoren e BE-së, Romana Vlahutin. “Kjo reformë u arrit me konensus dhe ne konfirmuam vullnetin tonë për miratimin e plotë të kësaj pakete. Pjesa më delikate e procesit kaloi me mirëkuptim dhe të vazhdojmë të kemi qëndrim të hapur që i hap rrugë procesit. Ne vlerësojmë se mirëkuptimi i gjerë është vlerë e shtuar në soliditetin e reformës që po formësojmë”.
“Është reformë madhore, që e presin qytetarët dhe është bërë investim shumë i rëndësishëm politik. Debatet nuk duhet të jenë të pakapërcyeshme. Me Lu dhe Vlahutin ndamë të njëjtin vullnet dhe dëshirë”, shtoi Vasili.