Lufta kundër trafikut të organeve njerëzore, Shqipëria pjesë e Konventës së KiE-së

Parandalimi dhe lufta kundër trafikimit të organeve njerëzore është objekt i Konventës së Këshillit të Evropës, e ratifikuar të martën nga komisioni parlamentar i Ligjeve.

Gjatë prezantimit të Konventës në komision, Drejtoresha Juridike në Ministrinë e Brendshme, Enriketa Verlaku, sqaroi se objekti i këtij dokumenti zbatohet për trafikimin organeve njerëzore për qëllimin e transplantimit apo qëllime të tjera.

“Konventa synon parandalimin dhe luftimin e trafikimit të organeve njerëzore duke mundësuar mbrojtjen e të drejtave të viktimave të veprave penale të përcaktuara në këtë Konventë, si dhe lehtësimin e bashkëpunimit në nivele kombëtare dhe rajonale mbi veprime kundër trafikimit të organeve njerëzore”, theksoi Verlaku.

Ratifikimi i këtij akti nga parlamenti shqiptar sjell detyrimin për hartimin e një legjislacioni të brendshëm, në përputhje me të drejtat dhe liritë themelore të njeriut. Pr/ligji është një kontribut, sa i takon detyrimit të Shqipërisë si vend aspirant për anëtarësim në BE, në intensifikimin e luftës kundër krimit të organizuar dhe trafiqeve.