Macron pas takimit me Zelenskyn në Bruksel: Ukrainës t’i jepen të gjitha mjetet për të mbrojtur popullin dhe infrastrukturën

BRUKSEL – Presidenti francez Emmanuel Macron tha të enjten, pas takimit në Bruksel me presidentin ukrainas Volodymyr Zelensky, se është thelbësore që Ukrainës t’i jepen të gjitha mjetet që i duhen për të mbrojtur popullin civil dhe infrastrukturën e saj, siç njofton Reuters.

Takimi u zhvillua në kuadër të samitit të liderëve evropianë në Bruksel, ku Zelensky po kërkon mbështetje të mëtejshme mbrojtëse për Ukrainën.

Zelensky, duke shkruar në Telegram, e përshkroi bisedën me Macron-in si shumë konkrete dhe tha se Ukraina e vlerëson Francën, e cila ndihmon sa më shumë për të gjetur përgjigje ndaj përshkallëzimit rus.

Sipas Zelenskyt, Franca do të japë më shumë ndihmë për aviacionin e Ukrainës gjatë muajit të ardhshëm.

Të dyja palët duan gjithashtu të përshpejtojnë punën për projektin FREYJA, sistemi evropian i mbrojtjes kundër raketave balistike.