Malajzia në zi: Varrosen viktimat e flurimit “Mh17”
Në Malajzi sot është shpallur ditë zie. Flamujt janë ulur në gjysmë shtizë. Gjithë kombi mban zi për viktimat e fluturimit “MH17”, të cilët ndërruan jetë kur aeroplani “Malaysia Airlines” me 298 pasagjerë u rrëzua mbi Ukrainë, më 17 korrik.
Trupat e viktimave arritën në Kuala Lumpur me fluturim special “çarter” nga Amsterdami.
I tërë kombi ka ndërprerë punën për një minutë heshtje në nder të viktimave.
Gjithashtu u ndal edhe i tërë transporti publik, duke përfshirë metrotë, transmeton Telegrafi.
Besohet se avioni malajzian është qëlluar nga një raketë e hedhur nga kryengritësit prorusë në Ukrainë, të cilët i kanë mohuar këto akuza.
Të gjithë 298 pasagjerët dhe ekuipazhi vdiqën pasi një “Boeing 777” u rrëzua në territorin ukrainas.
Ndërkaq, kompania ajrore “Malaysia Airlines” ka njoftuar se do të organizojë lutje për të vdekurit nga kjo tragjedi, dhe se ngjarja do të jetë e hapur për publikun.
Vlen të theksohet se kjo është hera e parë që shteti i Malajzisë të shpall ditë zie për viktimat civile, pasi që deri më tani, ky nder bëhej vetëm nëse ndërronte jetë ndonjë pjesëtar i familjes mbretërore apo udhëheqës qeveritar.
