Rajoni
Mali i Zi heq dorë nga vendimi i bashkimit me Serbinë
Parlamenti i Malit të Zi ka shfuqizuar vendimin e 100 viteve më parë ku sanksionohej bashkimi me Mbretërinë e Serbisë. Vendimi është marrë të premten nga deputetët malazezë, të cilën e cilësuan përfundimin e Kuvendit të Podgoricës në nëntor të vitit 1918, pas Luftës së Parë Botërore, si një lëvizje aneksuese nga ana e Beogradit. Madje ata u shprehen se zyrtarët vendas që e votuan atë kundër vullnetit të popullit duhet të konsiderohen tradhtarë.
Debati maratonë për këtë çështje nisi një ditë më parë mes fyerjeve dhe gati sa nuk përfundoi në përleshje fizike mes deputetëve të maxhorancës dhe pakicës parlamentare.
Mocioni për debatin u firmos nga 42 parlamentare të nxitur nga vendimi i Podgoricës një muaj më parë për të ndalur ceremonitë përkujtimore të 100-vjetorit të bashkimit të Serbisë me Malin e Zi.
Atëkohë, presidenti Vuçiç tha se nuk e kuptonte vendimin e autoriteteve malezeze pasi çdo person duhet të lejohet të mendojë sipas dëshirës dhe të ketë një pikëvështrim të vetin rreth së kaluarës.
Mali i Zi ka qenë një nga gjashtë republikat përbërse të ish-Republikës Federale të Jugosllavisë.
Pas shpërbërjes së tij në vitet 1990, vendi mbeti pjesë e Serbisë deri para shkëputjes me referendum në mënyrë paqësore në maj të vitit 2006.
Me vendim të europarlamentarëve një ditë më parë, Mali i Zi pritet të anëtarësohet në Bashkimin Europian në vitin 2025.
