Maqedonci diskuton me ambasadorin amerikan në NATO për anëtarësimin e Kosovës në aleancë

Ministri i Mbrojtjes së Kosovës, Ejup Maqedonci, është takuar me ambasadorin amerikan në NATO, Matthew Whitaker, ku kanë diskutuar për rrugën e Kosovës drejt anëtarësimit në NATO dhe zgjerimin e bashkëpunimit në fushën e mbrojtjes, siç njofton Klan Kosova.

Sipas njoftimit të Maqedoncit në Facebook, Whitaker ka shprehur mbështetjen për integrimin e Kosovës në NATO dhe për vazhdimin e përkrahjes amerikane në zhvillimin e kapaciteteve mbrojtëse të vendit.

Maqedonci shprehu mirënjohjen për mbështetjen dhe kontributin e vazhdueshëm të SHBA-së për Kosovën, Ministrinë e Mbrojtjes dhe Forcën e Sigurisë së Kosovës, duke theksuar rëndësinë e veçantë të bashkëpunimit me Gardën Kombëtare të Iowa-s, që zhvillohet prej më shumë se 15 vjetësh në kuadër të Programit të Partneritetit Shtetëror. Ky partneritet forcon kapacitetet përmes trajnimeve, ushtrimeve të përbashkëta dhe shkëmbimit të përvojave.

Bashkëpunimi po zgjerohet edhe në fushat e prokurimeve ushtarake dhe të industrisë së mbrojtjes. U diskutua për zhvillimin e kapaciteteve, përfshirë sistemet e blera nga SHBA-ja dhe procedurat e nisura për blerjen e helikopterëve Black Hawk, si dhe mbështetjen për zhvillimin e industrisë vendore të mbrojtjes në Kosovë.

Temë tjetër ishte shqyrtimi i mundësive për bashkëpunim sipas parimit të ndarjes së përgjegjësive, përfshirë në kampin Bondsteel dhe në Aeroportin e Gjakovës. Maqedonci ritheksoi nevojën për mbështetjen e Kosovës në rrugën drejt anëtarësimit në NATO, zgjerimin e qasjes së ushtarakëve kosovarë në programet dhe shkollat e NATO-s, si dhe bashkëpunimin e mëtejshëm me NATO-n lidhur me praninë dhe optimizimin e KFOR-it dhe normalizimin e hapësirës ajrore të Kosovës.

Ai përmendi edhe kontributin e Kosovës në Forcën Ndërkombëtare Stabilizuese në Gaza si dëshmi të gatishmërisë për të marrë përgjegjësi dhe për të kontribuar në paqen dhe sigurinë ndërkombëtare, dhe e ftoi ambasadorin Whitaker të vizitojë Kosovën.